Am Afang simer überzügt gsi: "Die ersti Gschäftsreis geit nach Indonesie!" Us derä Idee isch so mittuviu worde u mir si stattdessä z Bärn glandet. Aber aus dr Reihe nah.

 

Aues het bimä Fyrabebier uf dr schöne Hirscheterrasse agfange. E sunnige, warme Herbstabe, mir d Schüüm im Aschlag und am philosophiere über z Läbe z Langnou. Drbi simer irgendeinisch bim Thema Mode glandet. Villech wöu eine vo üs zwe öppe die d Umbro Kollektion promptet, villech aber wöu mir ab und zue z Dress vom FC tüe wäsche.

Item. Mit Blick i die goldigi Herbststimmig, isch Tom e Gedanke cho, woner scho frücher mau het ga: nämlech die schönste Plätz vo Langnou ganz simpu ufenes T-Shirt z packe. Erschöpft vom Usarbeite vo derä Gschäftsidee heimer no grad mau Schüüm bsteut. 

 

Z ersch heimer üs ufenes Logo müesse einige. Da heimer scho die ersti Bousteu gha. "Wär vo üs isch mit Adobe Ilustrator vertrout?", leider kenä. Auso heimer Züri Thömu kontaktiert, är macht schiins mit däm Züg. Är het gmeint: "Giele, es isch ke Häxerei, chli turtorials uf youtube luege und när heiter das Zügg ratzfatz".

Mir hei nis mit däm Programm nid würklech zrächt gfunge und dahär heimer gseit, chum mir luege für e Grafiker*in. Dr eifachst Wäg isch z Internet. Und iz chunnt die Sach mit Indonesie is Spiu. Uf dr Platform Fiverr heimer zuefäuig e Person us Indonesie agschribe. Ihrer Sache hei super usgseh aber die erste Entwürf heimer so semioptimau gfunge sowie Kommunikation isch herusfordernd gsi. z.B Bedütig vom Äntelipark isch harzig zum Übermittle gsi. Mit däm isch das exotische Kapitu gschiteret und mir hei dr Dating Radius enger igschteut. So simer bir Chantal z Bärn glandet. Mir hei es paar Fritigäbe bi ihre im Atelier verbracht und am perfekte Logo gschrüblet. Drbi isch üses Logo dis. enstande.

 

Doch wieso zum Tüfu dis.? Ganz eifach, es si diner Erfahrige, auso isch es o chli di Äntelipark, dini Schmitte, dis Mühlistägli, dis. Langnou. Und das mit em Punkt am Schluss isch e lengeri Gschicht. Für churz z mache. Jedi Wäutmarke, wot chasch Ärnst näh, het e Punkt.

 

Merci Chantal für dini Büetz, du hesch mit em entwärfe vom Logo e ewige Platz i dr dis. Family uf sicher. Für d Sujets heimer e Grafiker is Boot ghout, wo i de schattige Ämmitaler Wäuder isch ufgwachse und e diräktere Bezug zu Langnou het. Di ruehegi und überleiti Arti vo Adnan u sis grafische Könne hei üs entscheidend witer bracht. Und ganz wichtig: mir si froh, dass du nid so naglisch wie Didi Hamann uf Sky90.

 

U sit eme Jahr isch es so wit, mir drucke üser T-Shirt mit einzigartigem Bezug zu Langnou z Burgdorf.

 

Hirscheterrasse sei Dank, merci aune dis. Fründe mit oder ohni Punkt.

 

Dis.

zwe Langnouer, ei Idee